The Honor of Soldiery

شرف الجندية مش مجرد كلمة بنسمعها أو شارة بنحطها على الكتف، الجندية أكبر من كده بكتير، لأنها بتعني انك تكون واقف في خط الدفاع الأول عن بلدك، عن أهلك، وعن كل حاجة غالية عندك.

مش كل واحد يعرف يعني إيه يكون جندي، اللي عاش التجربة دي بيعرف إن الجندية هي مدرسة الحياة الحقيقية.

أنا شخصياً مكنتش بحب الجندية، كنت بحس إنها قيد، وكنت دايماً بفكر إمتى اليوم اللي هخرج فيه وأعيش حياتي زي أي حد تاني.

بس بعد ما مريت بمحنة صعبة، رجعت بذاكرتي لأيامي في الجيش، وافتكرت إزاي كنا واقفين جنب بعض، بنحمي بعض وبلدنا.

افتكرت كل لحظة تعب وكل تدريب شاق، وكل مرة حسيت فيها إنك على وشك الاستسلام، بس بتلاقي نفسك مكمل علشان في حاجة أكبر منك بتدفعك للأمام.

افتكرت لما كنت بشوف في عيون زمايلي الخوف، بس مع ذلك، محدش فينا كان بيهرب أو يتراجع، لأن الجندية مش بتعلمك بس إزاي تحارب، بتعلمك إزاي تكون راجل، إزاي تواجه أصعب الظروف من غير ما تتردد أو تخاف.

الجندية علمتني إن الشجاعة مش في إنك تكون من غير خوف، الشجاعة إنك تكمل رغم خوفك.

دلوقتي، وبعد ما عدت الأيام دي، عرفت إن الجندية شرف عظيم.

شرف إنك تكون جزء من اعرق جيش نظامي في العالم، شرف إنك تكون بتمثل القوة والعزة في كل موقف.

الجندية علمتني حاجات كتير، علمتني الانضباط، الاحترام، والتضحية، علمتني إنك لما تكون جندي، بتكون جندي مش لنفسك، لأهلك، لبلدك، ولكل جندي قبلك عاش وضحى علشان العلم اللي بتحمله.

يمكن مكنتش بحب الجندية وقتها، لكن دلوقتي بقدر كل لحظة عشتها فيها، لأنني فهمت إنها مش مجرد خدمة مؤقتة، دي تجربة بتغيرك للأبد، وبتعلمك إن الشرف الحقيقي مش في المكانة ولا الرتب، الشرف الحقيقي في إنك تكون مستعد تحمي أرضك، مهما كلفك ده..!